உலகம்

உலகத்தை ஆட்டுவிப்பது
பணம் என்கிறான் வியாபாரி
பதவி என்கிறான் அரசியல்வாதி
அன்பு என்கிறான் நேசன்
கடவுள் என்கிறான் பக்தன்
விதி என்கிறான் சித்தன்
ஒன்று மட்டும் தெளிவாகிறது
ஆட்டுவிப்பது எதுவானாலும்
ஆடுபொருள் மனிதன் தான்.

பொறுப்பு

வெற்றிக்கு முழு காரணம்
நான் தான் என்று
கர்வம் கொள்ளும் மனிதன்
தோல்விக்கு காரணமாய் பொறுப்பேற்காமல்
நேரம் காலத்தை கூறுவதால்தான்
கோவில்களிலும் ஜோதிட நிலையங்களிலும்
கூட்டம் அலை மோதுகிறதோ ?

வேஷம்

அடிமைத்தனத்திற்கு எதிராக
ஆங்காரமாய் குரல்கொடுத்து
மக்களை அணைத்துக்கொண்டு
ஆறுதல்சொல்லி நடனமாடி
ஏற்றத்தாழ்வை ஒழிக்க
யோசனைகள் பலதந்து
உணர்வுமிக்க பாடலுக்கு
வாயசைத்து நடனமாடிவிட்டு
வீட்டிற்கு வந்ததும்
வேலைக்காரனை அடித்தான்
காரணம் எதுவுமின்றி.

விமர்சனம்

பத்திரிகை செய்திகளில்
தொலைக்காட்சி தொடர்களில்
திரைப்படங்களில்
வந்து கொண்டிருக்கும்
வன்முறைகளையும் , தகாதவைகளையும்
கூட பார்த்துக்கொண்டு
அமைதியாய் இருக்கும்
நடுத்தர வயதினர்
காதலை மட்டும்
கடுமையாய் விமர்சிக்க காரணம் ?
தன் குழந்தைக்கு
வந்துவிடக் கூடாது
என்ற எண்ணமோ !

அன்னா ஹசாரே

அனுமதி மறுத்தால் ஓடிவிட
ஜாதிக்கட்சி தலைவன்
என நினைத்தீரா ?

சிறையை பார்த்து
ஓடி பதுங்கும் சிறுபிள்ளை
என நினைத்தீரா ?

சிறைக்கு செல்வதை விளம்பரப்படுத்தும்
தரம்கெட்ட அரசியல்வாதி
என நினைத்தீரா ?

மத்திய அரசின் பூச்சாண்டி வேலையை
பார்த்து பயப்படும் மாநில அரசு
என நினைத்தீரா ?

திருடன் கையில் கொடுத்த சாவி போல்
அரசியல்வாதியின் கையில் கொடுத்த
லோக்பால் சட்டம்

கூர் மழுங்கும் என எதிர்பார்த்ததை விட
ஒருபடி மேலே போய்
தவறான ஊழல் புகாருக்கு
இரண்டு வருடம் சிறை தண்டனையாம்

கேட்ட மக்களுக்கே ரத்தம் கொதிக்கும் போது
வழிநடத்தும் தலைவர் வேடிக்கையா பார்ப்பார்

ஊழல் பெருச்சாளிகள் மிதக்கும் சாக்கடையில் (திகார் சிறை)
சற்றும் தளராமல் ஆரம்பித்த உண்ணாவிரதம்

முதல் இரு நாட்கள்
மக்களை திசைதிருப்ப
சில அமைச்சர்களின் ஊழல் (காமெடி) புகார்கள்
பகையாளியை பங்காளியாக்க
ஒரு சிறு முயற்சி

மக்கள் கூட்டம் பார்த்து மிரண்டு
வாய் மூடி நிற்பதை தவிர
வேறு வழி உண்டா ?

இதை விட்டால்
மீண்டும்
ஒரு சந்தர்ப்பம் வாய்க்காது.

மீண்டும் இந்தியா சுதந்திரம்
அடைய வேண்டும்
கொள்ளைகாரர்களிடம் இருந்து

வாழ்வியல்

உடல்நிலை சரியில்லாத தந்தையை 

மருத்துவமனைக்கு கூட்டிசெல்லும் போது

அவர் நம்மை கூட்டிசென்ற 

நினைவுகள் பல கிளர்ந்து 

நம்மை தந்தையாய் பாவித்து 

அவரை குழந்தையாய் மாற்றி 

வாழ்வியல் யதார்த்தத்தை காட்டுகிறது  

சுவடுகள்

சாலையில் ஆங்காங்கே காணப்படும்
ஒழுங்கற்ற டயர் தடங்கள்
சில குடும்பங்களின் மகிழ்ச்சியை பறித்த
வாழ்க்கை பற்றிய அழியா சுவடுகளோ

நிதர்சனம்

ஓய்வில்லாத பணிகளுக்கு நடுவே
நேரம் அமைத்து யோசித்தாலும்
பதில் சொல்ல விளங்குவதில்லை
முதிர்ச்சியாய் கேள்விகேட்கும் பிள்ளை மனமும்
குழந்தையாய் கேள்விகேட்கும் பெற்றோர் மனமும்

மனசாட்சி

புத்தியின் அவமதிப்பையும் மீறி
சிலசமயம் மனசாட்சி அசைபோடுகிறது
செய்த தப்புகளையும்
கேட்காத மன்னிப்புகளையும்

Facebook

சிந்தையில் மலர்ந்த எண்ணங்களையும்
நெஞ்சை நெகிழவைத்த புகைப்படங்களையும்
மனதை கவர்ந்த வீடியோக்களையும்
நண்பர்களுடன் பகிர்ந்துகொள்ளும் போதும்
நண்பர்கள் பகிர்ந்ததை பார்க்கும்போதும்
அவர்களுடன் பயணித்த பசுமைநினைவுகளால்
மனதில் தோன்றும் எண்ணஅலைகளை
உடனுடக்குடன் பகிர்ந்து கொண்டு
வெளிப்படையாய் கருத்து சொல்லும்போது
குறைவது
தூர இடைவெளி மட்டுமல்ல
நட்பின் இடைவெளியும் தான்.

உதவி

இசையை கேட்கும் ஆவலில்
புல்லாங்குழல் செய்ய
உதவி செய்கிறதோ
மரங்கொத்தி பறவை

வெள்ளித்திரை

ஆர்ப்பாட்டமான அறிமுக பாடல்
தேவையில்லாத அடுக்குமொழி வசனங்கள்
யதார்த்தத்தை மீறிய சண்டைகாட்சிகள்
இடையிடையே பாடலும் ஆடலும்
மிகப்பெரிய பேனரின் வெளியீடு
என வழக்கமான ஃபார்முலாவோடு
வெளிவரும் மசாலாபடங்களின் மத்தியில்
சத்தமில்லாமல் சாதித்து கொண்டிருக்கும்
நல்ல கதையம்சமுள்ள படங்கள்தான்
எங்களை திரையரங்குகளுக்குள் இழுக்கிறது

வலி

வீட்டில் திருடியவனை அடிக்கும்போது
மனம் வலிக்கத்தான் செய்கிறது
நாட்டையே கொள்ளையடிக்கும் மந்திரிக்கு
வாகனக் கதவை திறந்துவிட்டு
மரியாதை செய்ததை நினைக்கையில்

முயற்சி

படிப்பில் முதல்மதிப்பெண் எடுத்தேன்

விளையாட்டில் முதல்மாணவனாக வந்தேன்

என் நண்பன் ஆச்சர்யப்பட்டான் 

அவனுக்கு தெரியபோவதில்லை 

என் அம்மாவுக்கும் அப்பாவுக்கும் 

தினமும் நடக்கும் சண்டையில் 

என்னை அவர்கள் கண்டுகொள்வதற்காக 

நான் செய்யும் பிரம்மப்பிரயத்தனம் என்று

ஊசல்

நண்பர்களுடன் போட்டியிட பட்டம் செய்து 

வானவில் கலவையில் வர்ணம் தீட்டி 

துடுப்பாக முழநீள வால் ஒட்டி

கைமாறாமலிருக்க நூலில் மாஞ்சா ஏற்றி 

காற்றுக்கேற்ப நுணுக்கமாய் பறக்க விடும்போது 

மனம் சிந்திக்க மறுக்கிறது 

காற்றில் பறக்கும் பட்டத்தின் நூலிழையில் 

ஏதோ ஒருஉயிரின் முடிவு ஊசலாடிக்கொண்டிருப்பதை... 

(ஒற்று)மை

மையிடப்பட்ட பேனாவும் விழிகளும்
மிகவும் தொல்லை தருகிறது
கவிதை படைத்து ரசிக்கச் சொல்லி

விந்தை

ஜாதி பார்த்து கலக்கும்
திருமணப் பூச்சரத்தில் கூட
பிறர் அறியா வண்ணம்
சில காதல்பூக்கள் மொட்டவிழ்த்து
மணம் சேர்க்கத்தான் செய்கிறது.

சுழற்சி

சூரிய கதிரை வெப்பத் தூரிகையாக்கி
புவிநீரை தொய்த்து விண்ணில் தெளித்து
கரிய மேகங்களை சித்திரங்களாய் தீட்டி
மழையை பூமிக்கு கவிதையாய் பிரசவித்து
பசுமைத் தாவரங்களை பெருகிடச் செய்யும்
இயற்கை தாய்க்கு ஈடிணை உண்டோ !

பதிவுகள்

கடல் அலைகளில் கால்நனைத்து
உன் மடியில் தலைவைத்து
ஓயாமல் பேசும் ஒலியலைகளை
என்மனம் தணிக்கை செய்தாலும்
சுகந்தமான வாசனையால் கிறங்கிப்போய்
தென்றல் தழுவிய உன்அருகாமையில்
காற்றில்படபடக்கும் காகிதமாய் உன்இமைகளும்
நாணத்தால் நிற்காமல்அசையும் கருவிழிகளும்
தலையாட்டல்களுக்கேற்ப அசையும் காதுதொங்கல்களும்
அழகாய் செதுக்கிவைத்த சிறுநாசியும்
இடைவிடாமல்பேசும் உதட்டின் சுழிப்புகளும்
காற்றசைவிற்கு நடனமாடும் கார்கூந்தலும்
ஆஸ்கார் விருது வாங்கிய
பேசும்படங்களாய் என் நினைவலைகளில்

புரிதல்

இரவு பகலாய் கண்விழித்து
காதல் கடிதம் தீட்டி
பயத்துடன் அவளிடம் கொடுத்தேன்
பிரித்து பார்த்துவிட்டு முழித்தாள்
அப்போது தான் புரிந்தது
என்உயிராய் நேசிக்கும் தமிழை
அவளுக்கு வாசிக்கவே தெரியாதென்று

தேடல்

இருவருக்கும் தெரிந்த
காதலை பரிமாறிக்கொள்ள
வார்த்தைகளை தேடுகிறோம்
இன்னும் அகப்படவில்லை
நம்முடைய காதலின்
திரையாய் மௌனம்
நம்மைப்பார்த்து சிரித்தபடி

அதிர்ஷ்டம்

மழைக்கு யோகம்
குடை எடுத்துவராத
அவள்மீது விழுந்து
அடைந்தது மோட்சம்

அன்னையர் தினம்

என் கண் பார்த்து
மன ஓட்டங்களை படிப்பாள்
தொலை தூரத்தில் இருந்தாலும்
என்குரல் மூலம் நலமறிவாள்
எனக்காக பல செய்வாள்
என்னிடம் எதுவும் எதிர்பார்த்ததில்லை
நான் உண்பதை பார்த்து
அவள் பசி மறப்பாள்
மலையளவு பிரச்சினை வந்தாலும்
வெற்றிபெற தைரியம் கொடுப்பாள்
அடுத்த ஜென்மம் இருந்தாலும்
உன்மகனாக பிறக்கவே ஆசை
இப்பிறவியில் உன்மகனாக பிறக்க
முன்பிறவியில் என்னதவம் செய்தேனோ
எந்த பதவியில் இருந்தாலும்
குபேர வாழ்க்கையே வாழ்ந்தாலும்
உன் காலடியே என்சொர்க்கம்
அன்னையே நடமாடும் தெய்வமே
அன்னையர் தினமான இன்றும்
என்றும் உனை மறவேன்

தாயுள்ளம்

முதியோர் இல்லத்தில் விடப்பட்ட தாய்
கோயிலுக்கு சென்று பிரார்தனை செய்தாள்
தன்னை வீட்டிற்கு கூட்டிச்செல்ல வேண்டும்
என்பதற்காக அல்ல
இல்லத்தில் விட்டுவிட்டோமே என்று தன்மகன்
வருத்தப்படக்கூடாது என்பதற்காக

ஐயம்

சாலையோர மரங்களை வெட்டுவதாலா இடித்த நிறுத்த வழியில்லாமல் இறப்பவர்கள் எண்ணிக்கை அதிகரிக்கிறது.

வேற்றுமையில் ஒற்றுமை

நாத்திகனின் எண்ணங்கள்
ஆத்திகனிலிருந்து வேறுபட்டாலும்
யோசிப்பது என்னவோ
கடவுளை பற்றித்தான்.

மனிதம்

ஒவ்வொரு முறை
ஆம்புலன்ஸ் அலறும்போதும்
நாத்திகம் பேசாமல்
மனம் வேண்டுகிறது
முகம்தெரியாத உயிருக்காக

விதவை

கடவுள் வரைந்த
புள்ளியில்லா கோலம்

உறுதி மொழி

பந்தயதிற்காக ஒருநாள்
பட்டினி கிடந்தேன்
அன்றிலிருந்து விட்டுவிட்டேன்
உணவை வீணாக்குவதை

காலத்தின் தீர்ப்பு !

நீதி தவறிய கொடுங்கோலராய் மகன்
தவறாக தண்டிக்கப்பட்ட அப்பாவி கைதியாய் தந்தை
மரண சாசனத்தில் இடப்பட்ட கையொப்பம்
கீழுலகத்தில் இருந்து மேலுலகத்திற்கு அல்ல
இல்லத்தில் இருந்து முதியோர் இல்லத்திற்கு
ஆனால் மகனை தந்தையாக்கி முடிவு
தந்தது காலம்.

பாசம்

முத்தம் கொடுத்துக் கொஞ்ச கூட
உடலில் தெம்பு இல்லை
இருந்த உணவை குழந்தைக்குக் கொடுத்துவிட்டு
பசியுடன் பெற்றோர்கள்.

மே தினம்

வியாபார மயமான உலகம்
பணத்தை துரத்தும் மனிதர்கள்
இவற்றின் மத்தியில்
உழைப்பால் உயர்ந்தோர்கள் அதிகம்
உங்கள் சிந்தையில் நுணுக்கமும்
செயலில் சீரிய வேகமும்
அதிக ஈடுபாட்டுடன் உழைத்து
வாழ்வில் மேலும் உயர்ந்திட
உழைப்பாளர் தின வாழ்த்துக்கள்

ஞானம்

கண் எதிரே
சமபல எதிரணியுடன்
தன்படை தோற்று
கோப்பையை இழந்து
கதிகலங்கி நிற்கும்போது
புத்தியில் தோன்றியிருக்குமோ
ஆதரவற்ற அப்பாவிகளை
கொன்று குவித்தது
வெற்றியே அல்ல
ஈனச்செயல் என்று.

சுனாமி

ஏழை பணக்காரன்
ஏற்றத்தாழ்வை நீக்க
இயற்கை விளையாடும்
கோர விளையாட்டோ !